فى البيت عملوا علىَّ «تمرد».. وقالوا عايزين تركِّب تكييف.. وأنا كمان عملت «تجرد».. وقلت كفاية وبلاش مصاريف!!.. قالوا الحر الصيف ده ولعة.. اشتريه إن شاالله نجوع.. قلت الناس منورة شمعة.. والكهرباء بتقطع بالأسبوع!!..
قالوا طيب هات لينا كولدير.. يسقع لينا الميه شوية.. قلت كفاية بقى تبذير.. وسد النهضة قطع المية!!.. قالوا مشروع النهضة بكره جاى.. وإن شاالله يعمل إنجاز.. قلت المشروع ده فى الباى باى.. لأنه قايم على لمبة جاز!! وقلت أنسوا المشروع ده بالمرة.. والكلام كله طلع أستروبيا.. والمشروع خلاص اتعمل بره.. والرئيس افتتحه فى إثيوبيا!!..
قالوا الدنيا اسودت فى عينينا. عيشتنا سودة فى كل مكان.. قلت لهم اسكتوا شوية.. أحسن يتهموكوا بازدراء الأديان!!.. قالوا أحنا هنولع خلاص فى نفسنا.. هات لنا معاك جركن بنزين.. قلت يارب ده كان نفسى.. بس مفيش بنزين تمانين!!.. قالوا نبيع أملاكنا ونهاجر.. ونعمل بره أى استثمار.. قلت قبل ما نركب ونسافر.. هنلاقى فى المطار ضبط وإحضار!!
التعليقات