شرع العتمه على حزنك:دريشه
بيتمدد لآخر جروحك:فضاءك
وانغمس به /وانغمس به/صير ريشه
صير ضيّ..
لو يمرونك على هيئة حياة..
وحدك اللي حيّ
في صيغة ممات..
حسّ كيف إن العمر يسرق بهاءك
وإنك اوجع من سكن هالروح:عيشه
..قبل لا تفرض كذا أو هكذا..
.. .. لك علي أجوّد الحسرات لّي..
.. .. وآهبك في ربكة الدنيا ثبات..
لو خطر لك يوم تتحسس بقاءك
أو تيقنت العمر يفنى حشيشه
هات لي من باقة أوجاعك شوي..
إفرد أجنحة الخيال /الذاكرة
طير يَمّ الذكريات
هاااااات شيّ!
أو
اغلق الدنيا على ضجة شقاءك
وانتصر للوحده المُرّه الدهيشه
لا تحسب إن الغبا كلّه غباءك
وإنّك أصدق من وَهَب للشِّعر طيشه
أو تَحسب إن المدى الشاسع خلاءَك
وانك اللي ناصبٍ فوقه عريشه
وأن سرْب الغيم ذا كلّه أرائك
وان فيها من البها مسْحَة :غويشه
والهوى اللي يسرج الأنفس هواءك
وانك اللي صَادِه وْخَشه بخيشه!!
فووووووق
..ما وأد أحلامك إلا
.. .. بحْلقَتْك لْـــ …….فوق!
إنت مثل اللي رأى الدنيا ملاءك
كسّر يدين الرحى واومى جريشه
صحت بك من ضيقتي
أو بالأحرى ..صحت بّي
.
.
دنيتك يا خيّ:
كالمنافق لا وقع في أمر شائك
مَعْ نبي الله وْمَعَ ثُلّة قريشه!
التعليقات